ព័ត៌មានព័ត៌មានថ្មីៗសាកលវិទ្យាល័យ ពាណិជ្ជសាស្ត្រ អេស៊ីលីដា បើកបវេសនកាលឆ្នាំសិក្សាថ្មី ២០២៥-២០២៦ ជាមួយកំណើននិស្សិតផ្នែកហិរញ្ញវត្ថុយ៉ាងខ្លាំងក្លា

សាកលវិទ្យាល័យ ពាណិជ្ជសាស្ត្រ អេស៊ីលីដា បើកបវេសនកាលឆ្នាំសិក្សាថ្មី ២០២៥-២០២៦ ជាមួយកំណើននិស្សិតផ្នែកហិរញ្ញវត្ថុយ៉ាងខ្លាំងក្លា

ថ្ងៃទី២៧ ខែកុម្ភៈ ឆ្នាំ២០២៦

សាកលវិទ្យាល័យ ពាណិជ្ជសាស្ត្រ អេស៊ីលីដា (AUB) បានប្រកាសបើកបវេសនកាលឆ្នាំសិក្សាថ្មី ២០២៥-២០២៦ សម្រាប់និស្សិតជំនាន់ទី ១០ ក្នុងបរិយាកាសដ៏រំភើប រីករាយ។ ការបើកទំព័រឆ្នាំសិក្សាថ្មីនេះ បានឆ្លុះបញ្ចាំងពីសន្ទុះនៃកំណើននិស្សិតសិក្សាលើជំនាញផ្នែកហិរញ្ញវត្ថុ និងធនាគារនៅកម្ពុជា ដែលកំពុងកើនឡើងគួរឱ្យកត់សម្គាល់ ស្របតាមការរីកចម្រើនយ៉ាងឆាប់រហ័សនៃប្រព័ន្ធហិរញ្ញវត្ថុ ឥណទាន និងការទូទាត់តាមប្រព័ន្ធឌីជីថល។

កំណើននិស្សិត និងតម្រូវការទីផ្សារការងារ

ក្នុងពិធីបើកបវេសនកាលនេះ លោកបណ្ឌិត ផុន ណារិន សាកលវិទ្យាធិការនៃសាកលវិទ្យាល័យ ពាណិជ្ជសាស្ត្រ អេស៊ីលីដា បានមានប្រសាសន៍ថា សម្រាប់និស្សិតជំនាន់ទី ១០ ឆ្នាំសិក្សា ២០២៥-២០២៦ នេះ មាននិស្សិតមកសិក្សាសរុបចំនួន ១,៧៦៦ នាក់ ដែលក្នុងនោះមាននិស្សិតស្រីរហូតដល់ ៩៣០ នាក់។

កំណើនដ៏ខ្ពស់នេះសបញ្ជាក់ឱ្យឃើញពីតម្រូវការខ្ពស់លើការអប់រំ និងការស្រាវជ្រាវលើមុខវិជ្ជាធុរកិច្ច ហិរញ្ញវត្ថុ និងធនធានមនុស្ស ដើម្បីឆ្លើយតបទៅនឹងតម្រូវការទីផ្សារការងារនាពេលបច្ចុប្បន្ន។ លោកបណ្ឌិតបានបញ្ជាក់ថា ការសម្រេចចិត្តសិក្សាលើជំនាញទាំងនេះ គឺជាការបើកផ្លូវទៅរកឱកាសការងារដ៏សម្បូរបែប ដែលឆ្លុះបញ្ចាំងពីកំណើនសេដ្ឋកិច្ចជាតិជាតួអង្គរួម។

គុណភាពអប់រំកម្រិតអន្តរជាតិ

ដោយទទួលបានសេចក្តីទុកចិត្តលើកម្រិតគុណភាពអប់រំខ្ពស់ ក្រសួងអប់រំ យុវជន និងកីឡា គ្រោងដាក់បញ្ចូលសាកលវិទ្យាល័យ ពាណិជ្ជសាស្ត្រ អេស៊ីលីដា ជាសមាជិករបស់ ASEAN University Network Quality Assurance (AUN-QA)។ បច្ចុប្បន្ន សាកលវិទ្យាល័យមាន៖

ដៃគូសហការ៖ ជិត ១០០ ស្ថាប័ន មកពីសាកលវិទ្យាល័យជាតិ និងអន្តរជាតិ។
បណ្ដាញសកល៖ ជាសមាជិកនៃ Asia-Pacific Education Membership ដែលមានសាកលវិទ្យាល័យចំនួន ២៧៥ មកពី ២៦ ប្រទេសជុំវិញពិភពលោក។

កម្មវិធីសិក្សាដ៏សម្បូរបែប និងទំនើប

ដើម្បីឆ្លើយតបនឹងយុគសម័យឌីជីថល សាកលវិទ្យាល័យបានដាក់ចេញនូវកម្មវិធីសិក្សាជាច្រើនដូចជា៖

ហិរញ្ញវត្ថុ និងបច្ចេកវិទ្យា៖ ហិរញ្ញវត្ថុ និងធនាគារ, បច្ចេកវិទ្យាហិរញ្ញវត្ថុ (FinTech)។
ធុរកិច្ច និងសេដ្ឋកិច្ច៖ គណនេយ្យ, ទីផ្សារ, សេដ្ឋកិច្ចពាណិជ្ជកម្ម, គ្រប់គ្រងធុរកិច្ច និងសហគ្រាស, ពាណិជ្ជកម្មអន្តរជាតិ។
បច្ចេកវិទ្យា និងទិន្នន័យ៖ បច្ចេកវិទ្យាព័ត៌មានធុរកិច្ច, វិទ្យាសាស្ត្រ និងវិស្វកម្មកុំព្យូទ័រ, វិទ្យាសាស្ត្រទិន្នន័យ (Data Science)។
ភាសា និងជំនាញទន់៖ ភាសាអង់គ្លេសសម្រាប់ទំនាក់ទំនងធុរកិច្ច, ភាសាអង់គ្លេសសម្រាប់បំណិនបកប្រែ, ការបង្រៀនភាសាអង់គ្លេស (TESOL)។
ជំនាញឯកទេសផ្សេងៗ៖ នីតិសាស្ត្រ, គ្រប់គ្រងហានិភ័យ និងធានារ៉ាប់រង, គ្រប់គ្រងបណ្ដាញផ្គត់ផ្គង់ និងចលនូបត្ថម្ភ។

មោទនភាពបំផុតនោះគឺ និស្សិតដែលបញ្ចប់ការសិក្សាពី AUB មានអត្រាការងារធ្វើខ្ពស់រហូតដល់ ៩២.៦% ដែលនេះជាសក្ខីភាពបញ្ជាក់ពីគុណភាពបណ្ដុះបណ្ដាលដែលទីផ្សារការងារជឿទុកចិត្ត។